एजेन्सी । स्पेनीस ला लिगा फुटबलमा बार्सिलोनाले पहिलो खेलमा नै बराबरीमा रोकिएको छ । शनिबार राति भएको खेलमा बार्सिलोना रायो भालेकानोसँग गोलरहित बराबरीमा रोकिएको हो ।
घरेलु मैदान क्याम्प नोउमा भएको खेलमा बार्सिलोनाले पटक पटक गोलको लागि अवसर पाउँदापनि गोल गर्न सकेन । पहिलो हाफमा बार्सिलोनाले दबाब दिएपनि दोस्रो हाफका सुरुवातमा भने रायो भालेकानोले केहि राम्रो अवसरहरु सिर्जना गरेको थियो । तर उसले गोल भने गर्न सकेन ।
खेलको इन्जुरी समयको तेस्रो मिनेटमा बार्सिलोना १० खेलाडीमा झरेको थियो । उसका सर्जियो बुस्क्वेट्स दोहोरो पहेलो कार्ड पाउँदै मैदानबाट बाहिरीएका थिए ।
पुरै खेलमा बार्सिलोनाले ६७ प्रतिशत बल पोसेसन बनाउँदा २१ वटा पोष्ट चार्ज गरेको थियो । जसमा ६ वटा फ्रेममा रहेपनि गोल भने गर्न सकेन । यता रायो भालेकानोले पुरै खेलमा मात्र चार सट प्रहार गरेको थियो ।
नयाँ सिजनमा भिल्ला रियल र ओसासुनाले जितका साथ प्रतियोगिता सुरु गरेका छन ।
