भदौ १५ काठमाडौं । युएईमा जारी एसिया कप २०२२ क्रिकेटमा अफगानिस्तानले लगातार दोस्रो जितसहित सुपर ४ मा स्थान बनाएको छ ।
मंगलबार राति सम्पन्न भएको खेलमा बंगलादेशलाई ७ विकेटले हराउँदै अफगानिस्तानले सुपर ४ मा स्थान बनाएको हो । बंगलादेशले दिएको १२८ रनको लक्ष्य अफगानस्तानले १८.३ ओभर ३ विकेट गुमाएर पूरा गर्यो ।
अफगानिस्तानका नाजिबउल्लाह जाड्रानले अविजित रहँदै सर्वाधिक ४३ रन जोडे भने, इब्राहिम जाड्रानले ४१ बलमा ४ चौकासहित अविजित ४२ रन बनाए । हाज्रातुल्लाह जाजइले २३ रन बनाए ।
बंगलादेशका लागि शकिब अल हसन, मोसाडिक होसेन र मोहम्मद साईफुदिनले १/१ विकेट लिए ।
त्यसअघि पहिले ब्याटिङ गरेको बंगलादेशले २० ओभरमा ७ विकेट गुमाएर १२७ रन बनाएको थियो ।
उक्त जितसँगै समूह बी को अफगानिस्तानले २ खेलमा ४ अंक जोडेको छ । पहिलो खेलमा अफगानिस्तानले श्रीलंकालाई ८ विकेटले हराएको थियो । अफगानिस्तान अंक तालिकाको शीर्ष स्थानमा रहेको छ । पराजित बंगलादेश अंकविहीन छ ।
