काठमाडौं । स्पेनिस ला लिगा फुटबलमा साविको विजेता रियल मड्रिड बराबरीमा रोकिएको छ ।
आइतबार राति भएको खेलमा रियलले ओसासुनासँग १-१ गोलको बराबरी खेलेको हो ।
घरेलु मैदानमा सुरुवाती अग्रता जोगाउन नसक्दा रियलले अंक बाड्नु परेको हो । खेलको ४२औं मिनेटमा भिनियस जुनियरले गोल गर्दै रियललाई सुरुआती अग्रता दिलाएका थिए । तर, खेलको ५५ औं मिनेटमा किकेले गोल गर्दै ओसासुनालाई १-१ को बराबरीमा ल्याए ।
खेलको ७८औं मिनेटमा गार्सियाले रातो कार्ड पाएपछि ओसासुना १० खेलाडीमा समेटिएको थियो ।
यस्तै खेलको ७९औं मिनेटमा रियलका करिम बेन्जिमाले पेनाल्टीमा गोल गर्न चुकेपछि रियल जित निकाल्न असफल भयो ।
उक्त बराबरीसँगै रियलले शीर्ष स्थानमा उक्लने मौका गुमाएको छ ।
रियल ७ खेलमा १९ अंक जोडेर दोस्रो स्थानमा रहेको छ । शीर्ष स्थानको बार्सिलोनाको १९ अंक नै रहेको छ । ओसासुना १३ अंक जोडेर छैटौं स्थानमा रहेको छ ।
