असोज २४ काठमाडौं । बंगलादेशमा आगामी १ देखि ११ नोभेम्बरसम्म सञ्चालन हुने साफ यू-१५ महिला च्याम्पियनसिपको खेल तालिका सार्वजनिक भएको छ। सोमबार साउथ एसियन फुटबल फेडेरेसन ९साफ०ले खेलतालिका सार्वजनिक गरेको हो ।
च्याम्पियनसिपमा आयोजक बंगलादेशसहित नेपाल र भुटान गरी जम्मा ३ टोलीले स्पर्धा गर्नेछन् । च्याम्पियनसिप डबल राउन्ड रोविनका आधारमा खेलाइनेछ। हरेक टिमले एकअर्कासँग दुई-दुई खेल खेलेपछि धेरै अंक जोड्ने टोली च्याम्पियन बन्नेछ ।
नेपालले पहिलो खेल ३ नोभेम्बरमा भुटानसँग खेल्नेछ । बंगलादेशसँग ५ नोभेम्बरमा दोस्रो खेल खेल्नेछ । नेपालले भुटानसँग दोस्रो खेल ९ नोभेम्बर र बंगलादेशसँग ११ नोभेम्बरमा खेल्नेछ । साफ यू-१५ महिला च्याम्पियनसिपका लागि मुख्य प्रशिक्षक भगवती राना मगरको नेतृत्वमा ३० खेलाडीले तयारी गरिरहेका छन् ।
