कार्तिक ३ काठमाडौं । गण्डकी प्रदेशका विभिन्न ८ जिल्लामा आयोजना सम्पन्न भएको नवौं राष्ट्रिय खेलकुद प्रतियोगितामा विभागीय टोली त्रिभुवन आर्मी क्लबको टिम च्याम्पियन बनेको छ ।
प्रतियोगितामा आर्मी १ सय ७२ स्वर्ण पदकसहित कुल ३ सय ७१ पदक जितेर टिम च्याम्पियन बनेको हो । उसले ११० रजत र ८९ कास्यपदक जितेको हो ।
यस्तै पहिलो पटक बनेको राष्ट्रिय खेलकुदको रनिङ शिल्ड ट्रफी पनि आर्मीले उचालेको छ । आर्मी आठौं संस्करणकोसमेत टिम च्याम्पियन हो ।
यता नवौं राष्ट्रिय खेलकुदमा पदक तालिकाको दोस्रो स्थानमा अर्को विभागीय टोली शसस्त्र प्रहरी बलको एपीएफ क्लब रह्यो । उसले ६५ स्वर्ण, ७३ रजत र ८१ कास्य पदकसहित कुल २ सय १९ पदक जितेको छ ।
यस्तै अर्को विभागीय टोली नेपाल पुलिस क्लबले ६१ स्वर्ण, ६० रजत र ७३ कास्य सहित कुल १९४ पदक जित्दै तेस्रो स्थान हात पार्यो ।
यसैगरी गण्डकी प्रदेशले ३२ स्वर्ण, ३१ रजत र ५७ कास्य सहित कुल १२० पदक जित्दै चौंथो र बागमती प्रदेशले २४ स्वर्ण, ४७ रजत र ७४ कास्य पदक सहित कुल १४५ पदक जितेर पाँचौं स्थानमा रह्यो ।
छैटौं स्थानमा रहेको प्रदेश १ ले १० स्वर्ण, २३ रजत, ५० कास्य सहित कुल ८३ पदक जित्यो । सुदूरपश्चिमले १० स्वर्ण, १० रजत ४३ कास्य सहित कुल ६३ पदक जितेर सातौं स्थानमा रह्यो ।
एनआरएनएले १० स्वर्ण, ९ रजत र ७ कास्य पदक सहित २६ पदक जितेर आठौं, लुम्बिनी प्रदेश ६ स्वर्ण, २२ रजत र ४० कास्य सहित ६८ पदक जितेर नवौं स्थान हासिल गर्यो ।
त्यसैगरी, दशौँ स्थान हासिल गरेको मधेश प्रदेशले ५ स्वर्ण, ८ रजत र २६ कास्य सहित कुल ३९ पदक जित्दा पुछारमा रहेको कर्णाली प्रदेशले २ स्वर्ण, ४ रजत, १२ कास्य पदक सहित कुल १८ पदक हात पार्यो ।
नवौँमा ३६ र दुई प्रदर्शनी गरी ३८ खेल सञ्चालन भएका थिए । यसअघि गत असोज २८ गते राष्ट्रिय खेलकुदको उपराष्ट्रपति नन्दबहादुर पुनले उद्घाटन गरेका थिए भने समापन समारोहमा प्रधानमन्त्री शेरबहादुर देउवा सहभागी भए । समापन समारोहमा विभिन्न सांस्कृतिक कार्यक्रम, झाँकी, गीत सङ्गीत तथा नृत्यलगायतका कार्यक्रम आयोजना गरिएको थियो ।
दशौं संस्करणको राष्ट्रिय खेलकुद २०८१ सालको मंसिरमा कर्णाली प्रदेशले आयोजना गर्नेछ । नवौंमा ११ टिमका ६ हजार १ सय ५७ खेलाडीले प्रतिस्पर्धा गरेका थिए ।
यस पटक विभागिय टोलि नेपाल पुलिस, नेपाल एपीएफ र नेपाल आर्मी सहित सात प्रदेशका सात टिम र एनआरएनए गरि ११ टिमका खेलाडीले सहभागिता जनाएका थिए ।
पदक तालिका:
