काठमाडौं । स्पेनिस ला लिगा फुटबल क्लब बार्सिलोनाका रक्षक जेरार्ड पिकेले फुटबलबाट सन्यास लिने घोषणा गरेका छन् ।
शनिबार घरेलु मैदान नोउ क्यापमा अल्मेरियाविरुद्ध अन्तिम खेल खेल्दै फुटबलबाट बिदा लिने पिकेले निर्णय लिएका हुन् । उमेरले ३५ वर्ष पुगेका पिकेले बार्सिलोना र म्यानचेस्टर युनाइटेडको लागि व्यवसायिक फुटबल खेलेका छन् ।
पिकेले बिहीबार राति करिब तीन मिनेटको भिडियो सार्वजनिक गर्दै फुटबल खेलबाट टाढा रहने निर्णय लिएका थिए । बार्सिलोनाले ला लिगामा शनिबार अल्मेरियासँग खेल्दैछ । ‘मैले सधै भनेको छु । बार्सिलोनानै अन्तिम हुनेछ,’ पिकेले भनेका छन् ।
पछिल्लो समय पिके निजी कारणले बढी विवादमा रहेका थिए । पाँच महिना अघि मात्र उनले आफ्नी प्रेमिका गायिका शाकिरासँग सम्बन्ध तोडेका थिए । साथै पिके बार्सिलोनामा आर्थिक संकटको बेला पारिश्रमिक घटाउन नमानेको भन्दै आलोचित पनि थिए ।
पिकेले सन् २००४ बाट बार्सिलोनामा खेल्न सुरुवात गरेका थिए । यसपछि म्यानचेस्टर पुगेका थिए । सन् २००७/०८ को प्रिमियर लिग र च्याम्पियन्स लिग उपाधि जितेपछि पिके सन् २००८ मा क्याटलान क्लब बार्सिलोना फर्किएका थिए ।
यस क्रममा उनले ६०० खेल खेल्दै ३० ट्रफि जितिसकेका छन् । जसमा ला लिगा, च्याम्पियन्स लिग र कोपा डेल रे जितेका छन् । पिकेले स्पेनबाट १०२ खेल खेलेका छन् । सन् २०१० को फिफा विश्वकप र सन् २०१२ को युरोपिन च्याम्पियन हुँदा पिके स्पेनको महत्वपूर्ण सदस्य थिए ।
