फिफा विश्वकपमा पोर्चुगलले विजयी सुरुवात गरेको छ । बिहिवार भएको खेलमा पोर्चुगलले घानामाथि ३-२ गोलको रोमाञ्चक जित निकालेको हो ।
खेलको ६५ औं मिनेटमा रोनाल्डोले पेनाल्टीबाट गोल गर्दै पोर्चुगललाई सुरुवाती अग्रता दिलाएका थिए ।
घानाका मोहमदले रोनाल्डोलाई पेनाल्टी क्षेत्रभित्र फउल गर्दै लडाएपछि पोर्चुगलले पेनाल्टी पाएको हो । जसमा रोनाल्डोले सहजै गोल गरे ।
उक्त गोलसँगै रोनाल्डोले लगातार पाँच विश्वकपमा गोल गर्ने पहिलो खेलाडीको कीर्तिमान बनाए ।
३७ वर्षीय रोनाल्डोले यस अघि २००६, २०१०, २०१४ र २०१८ को विश्वकपमा गोल गरेका थिए ।
यस्तै खेलको ७३ औं मिनेटमा आन्द्रे एयुले गोल गर्दै घानालाई १-१ गोलको बराबरीमा ल्याए ।तर खेलको ७८ औं मिनेटमा जोआ फेलिक्सले गोल गर्दै पोर्चुगललाई २-१ को अग्रता दिलाए भने खेलको ८० औं मिनेटमा राफायल लियोले गोल गरेपछि पोर्चुगल ३-१ गोलले अगाडि बढाए ।
त्यसपछि खेलको ८९ औं मिनेटमा घानामा ओस्मान बुकारीले गोल गरेपनि पोर्चुगल ३-२ ले विजयी भयो ।
उक्त जितसँगै समूह 'एच' को पोर्चुगलले पहिलो खेलमा ३ अंक जोड्दै समूहको शीर्ष स्थानमा रहेको छ । यता पराजित घाना भने पुछारमा रहेको छ ।
