राजधानीमा जारी यू-१९ राष्ट्रिय पुरुष क्रिकेट प्रतियोगितामा साविकको विजेता लुम्बिनी प्रदेश फाइनल प्रवेश गरेको छ । लुम्बिनी प्रदेशले मधेश प्रदेशलाई समूह चरणको अन्तिम खेलमा ५८ रनले हराउँदै लुम्बिनी फाइनलमा प्रवेश गरेको हो ।
टियु क्रिकेट मैदानमा लुम्बिनीले दिएको २२३ को लक्ष्य पछ्याएको मधेश ४५.४ ओभरमा १६४ रनमा अलआउट भयो ।
मधेशका लागि मयन यादवले ४५ बलमा ३८ रन बनाए । अलि अन्सारीले २२ तथा डब्लु मल्लिकले १८ रन बनाए । यस्तै नितेष गुप्ता १० र सरफराज अली मन्सुरीले ३१ रन बनाए ।
लुम्बिनीका लागि अभिषेक गौतम र विशाल बिक्रम केसीले समान ३/३ विकेट लिए । दुर्गेश गुप्ता, तुलबहादुर थापा, नर सार्की र निर्मल गुरुङले समान १/१ विकेट लिए ।
त्यसअघि पहिला ब्याटिङ गरेको लुम्बिनीले ५० ओभरमा ९ विकेटको क्षतिमा २२२ रन बनाउन सक्यो ।
लुम्बिनीका लागि प्रज्वल थापाले सर्वाधिक ८५ रनको अर्धशतकीय इनिङ पूरा गरे । उनले १ सय २८ बलमा ९ चौका र २ छक्कासहित ८५ रनमा आउट भए । यस्तै आकाश त्रिपाटीले २३ रन, विशाल भुषाल र निर्मल गुरुङ ले समान १३/१३ रन बनाए भने देव खनाल ११ रनमा आउट भए ।
यस्तै नर सार्की २६ रनमा अविजित रहे । यता मधेसका लागि निकेश गुप्ता ३ विकेट, अभिषेक तिवारी र नितेश यादवले समान २/२ विकेट लिए ।
उक्त जितसँगै लुम्बिनी लगातार दोस्रो पटक फाइनल पुगेको छ । अब फाइनलमा आगामी सोमबार लुम्बिनीले सुदूरपश्चिम प्रदेशको सामना गर्नेछ ।
