काठमाडौं । फ्रेन्च लिग वान फुटबल अन्तर्गत १० खेलाडीमा सीमित पेरिस सेन्ट जर्मेन पीएसजीले रेइम्ससँग अंक बाडेको छ । गएराति भएको खेलमा पीएसजीले रेइम्ससँग १-१ गोलको बराबरी खेलेको हो ।
फोलारिन बालोगुनले रेइम्सका लागि इन्जुरी समयमा गोल गरेपछि पीएसजीले अंक बाडेको हो ।
त्यसअघि खेलको ५१औँ मिनेटमा नेयमारले गोल गर्दै पीएसजीलाई सुरुवाती अग्रता दिलाएका थिए । तर ५९औँ मिनेटमा मार्को भेराटीले रातो कार्ड खाँदै मैदान बाहिरिएपछि पीएसजी १० खेलाडीमा सीमित भएको थियो ।
त्यसपछि दोस्रो हाफको इन्जुरी समयमा रेइम्सका बालोगुनले गोल गरेपछि खेल बराबरीमा टुंगिएको थियो ।
उक्त बराबरीसँगै पीएसजीले २० खेलबाट ४८ अंक जोड्दा दोस्रो स्थानको लेन्सको ४५ अंक छ । रेइम्स भने २६ अंकसहित ११औँ स्थानमा रहेको छ ।
