काठमाडौं । आईसिसी विश्वकप क्रिकेट लिग २ अन्तर्गत अन्तिम सिरिजको अन्तिम खेलमा पीएनजी यूएईसँग ६ विकेटले पराजित भएको छ ।
काठमाडौंको त्रिवि क्रिकेट मैदानमा पीएनजीले दिएको २३५ रनको लक्ष्य यूएईले ३८.४ ओभरमा मात्रै ४ विकेट गुमाएर पूरा गर्यो ।
यूएईका लागि कप्तान मोहम्मद वसीमले सानदार शतकीय पारी खेले । उनले मात्र ७६ बलमा १२ चौका ६ छक्कासहित ११९ रन बनाए । यस्तै वृत्य अरविन्द ३३ रन, रिजवानले २९ रन र आर्यन खान २७ रनमा आउट भए ।
पीएनजीका लागि रिले हेकुरे २ र काबुआ मोरियाले एक विकेट लिए ।
त्यसअघि काठमाडौंको त्रिवि क्रिकेट मैदानमा पहिले ब्याटिङ गरेको पीएनजीले निर्धारित ५० ओभरमा ७ विकेट गुमाएर २३४ रन बनाएको थियो ।
पीएनजीका लागि कप्तान असद भालाले सर्वाधिक ६६ रनको अर्धशतकिय पारी खेले । उनले ९ बलमा ६ चौका र १ छक्का प्रहार गरे । यस्तै नर्मन भानुवा ४९ रन, रिले हिकुरे ३३ रन, किप्लिन डोरिगा २४ रन, चाल्स अमिनि २२ रन बनाए भने गौडी टोकाले १५ रन बनाए ।
यता यूएईका लागि हजरत बिलालले सर्वाधिक ४ विकेट लिए ।
यसअघिको पहिलो खेलमा पीएनजीले युएईलाई ५६ रनले पराजित गरेको थियो ।
उक्त जितसँगै यूएईले ३५ खेलबाट ३३ अंक जोडेको छ । पराजित पीएनजीको भने ३६ खेलबाट ११ अंकसहित पूछारमा रहेर लिग २ अन्त्य गर्यो ।
