घरेलु टोली विराटनगर सिटी क्लबले सातौँ संस्करणको विराट गोल्डकप फुटबल प्रतियोगिता २०७९ को उपाधि जितेको छ ।
विहिबार राति भएको खेलमा विराटनगर सिटी क्लबले भारत केरलाको लुका सकर क्लबलाई ४-० गोल अन्तरले पराजित गर्दै उपाधि जितेको हो ।
विराटनगरस्थित सहिद रङ्गशालामा भएको फाइनल खेलमा विराटनगरका लागि अफीज ओलावाले, विमल घर्ति मगर, मेसोउके ओलोउमोउ र अभिषेक गुरुङले एक एक गोल गरेका थिए ।
विराटनगर सिटीले पहिलो हाफमा १-० को अग्रता लिएको थियो भने दोस्रो हाफमा तीन गोल गरेको थियो ।
विराटनगरले पूर्वविजेता नेपाल पुलिस क्लब र जावलाखेललाई हराउँदै फाइनलमा स्थान बनाएको थियो भने विराट गोल्डकपमा पहिलो पटक भाग लिएको लुका सकरले क्वाटरफाइनलमा सङ्कटा क्लबलाई र सेमिफाइनलमा साविक विजेता सशस्त्र प्रहरी बलको एपीएफ क्लबलाई टाइब्रेकरमा ४–२ गोलअन्तरले पाखा लगाउँदै फाइनलमा स्थान तय गरेको थियो ।
गोल्डकपमा नेपाल, भारत र भुटानका गरी आठ टोलीको सहभागिता रहेको थियो ।
प्रतियोगिताको विजेता घरेलु टिम विराटनगर सिटीले २० लाख १५ हजार नगद पुरस्कार जितेको छ भने उपविजेता लुका सकरले १० लाख २५ हजार पुरस्कार प्राप्त गरेको छ ।
विसं २०१८ मा ‘महेन्द्र गोल्डकप’का नामले सुरू भएको प्रतियोगिता २०५७ सालदेखि ‘विराट गोल्डकप’का रूपमा सञ्चालन हुँदैआएको छ ।
