काठमाडौँ । रियल म्याड्रिड स्पेनिस कोपा डेल रे फुटबलको फाइनलमा पुगेको छ ।
बिहिबार राति कोपा अन्तर्गतको एल क्लासिकोमा बार्सिलोनालाई उसकै घरेलु मैदान क्याम्प नेउमा पराजित गर्दै रियल म्याड्रिड यस सिजनको कोपा डेल रे को फाइनलमा पुगेको हो ।
दोस्रो लिगमा ४-० गोल अन्तरले पराजित गर्दै समग्रमा रियल म्याड्रिडले ४-१ गोल अन्तरको जित निकालेको थियो ।
यस खेलमा रियल म्याड्रिडको जितमा करिम बेन्जमाले ह्याट्रिक गरेका थिए । बेन्जमाले खेलको ५०, ५८ र ८०औं मिनेटमा गोल गर्दै आफ्नो ह्याट्रिक पुरा गरेका थिए । एक गोल भिनिसियस जुनियरले गरेका थिए ।
रियल म्याड्रिडका लागि बेन्जमाको यो लगातार दोस्रो ह्याट्रिक हो । उनले यस अघि अप्रिल २ मा ला लिगा अन्तर्गतको खेलमा भल्ला डोलीडविरुद्ध पनि ह्याट्रिक गरेका थिए ।
यस अघि सेमिफाइनलको पहिलो लिगमा बार्सिलोना १-० गोलले विजयी भएको थियो ।
रियल म्याड्रिडले अब कोपाको फाइनलमा ओसासुनाको सामना गर्ने छ । फाइनल खेल मे ६ मा हुने तालिका छ ।
