काठमाडौं । सातदोबाटो थुथ क्लब सहिद स्मारक ए डिभिजन लिग फुटबलको शीर्ष स्थानमा उक्लिएको छ ।
बुधबार त्रिपुरेश्वरस्थित दशरथ रंगशालामा मनाङ मर्स्याङ्दी क्लबलाई १-० गोल अन्तरले हराउँदै सातदोबाटो शीर्ष स्थानमा उक्लिएको हो ।
सातदोबाटोको जितमा दीपक सिंह ठकुरीले निर्णायक गोल गरे । उनले खेलको ४०औं मिनेटमा दीपकले गोल गर्दै सातदोबाटोलाई जित दिलाएका हुन् । निरज चौधरीले उपलब्ध गराएको पासमा उनले गोल गरे ।
उक्त जितसँगै शीर्ष स्थानमा उक्लिएको सातदोबाटोले ८ खेलमा १६ अंक जोडेको छ । सातदोबाटोको यो पाँचौं जित हो । यता पराजित मनाङले भने सिजनको पहिलो हार ब्यहोरेको छ । मनाङ ८ खेलमा १५ अंक जोडेर दोस्रो स्थानमा झरेको छ ।
