काठमाडौं । राजधानीमा जारी यस सिजनको शहिद स्मारक ए डिभिजन लिग अन्तर्गत चर्च ब्वाइज युनाइटेड क्लबले सातदोबाटो युथ क्लबलाई पराजित गरेको छ ।
बिहिवार दशरथ रंगशालामा भएको खेलमा चर्च ब्वाइजले सातदोबाटो युथ क्लबलाई २-१ गोल अन्तरले पराजित गरेको हो ।
चर्च ब्वाइजको जितमा आशिष चौधरी र मिलन राईले गोल गरेका थिए भने सातदोबाटोका लागि निरज चौधरीले एक गोल गरेका थिए ।
खेलको सातौं मिनेटमा आशिषको गोलबाट चर्च ब्वाइजले शुरुवाती अग्रता लिएको थियो भने खेलको ३४औं मिनेटमा सातदोबाटोका लागि निरजले गोल गर्दै खेल बराबरी गरेका थिए । त्यसपछि मिलनले निर्णायक गोल गर्दै चर्च ब्वाइजलाई खेल जिताएका थिए ।
उक्त जितसँगै चर्च ब्वाइज १० खेलमा १८ अंकसहित दोस्रो स्थानमा उक्लिएको छ भने १० खेलमा १७ अंकसहित सातदोबाटो चौथो स्थानमा झरेको छ । आजै हिमालयन शेर्पा क्लबलाई १-० ले हराएको थ्री स्टार १८ अंकसहित अंक गोल अन्तरको आधारमा तेस्रो स्थानमा रहेको छ ।
