काठमाडौँ । जारी शहिद स्मारक ए डिभिजन लिग फुटबल प्रतियोगिता अन्तर्गत २०औं चरणको खेलमा एपीएफ क्लबले मनाङ मर्स्याङ्दी क्लबलाई बराबरीमा रोकेको छ ।
आइतबार दशरथ रंगशालामा भएको खेलमा एपीएफ र मनाङ मर्स्याङ्दीले २-२ गोलको बराबरी खेलेका हुन् ।
खेलको ११औं मिनेटमा विश्वास राउतले रातो कार्ड पाएपछि एपीएफ १० खेलाडीमा सिमित भएको थियो ।
एपीएफले दुवै पटक एक गोलले पछि परेको अवस्थामा कमब्याक गर्दै खेल बराबरी गरेको थियो । एपीएफका लागि नविन लामा र अर्मान्ड डीडोउमले एक एक गोल गरेका थिए भने मनाङ मर्स्याङ्दीका लागि टिमोथी कोउडो र सुमित श्रेष्ठले एक एक गोल गरेका थिए ।
उक्त बराबरीसागै एपीएफको २० खेलमा २३ अंक भएको छ भने मनाङ मर्स्याङ्दी क्लबको २० खेलमा २४ अंक भएको छ । यो सँगै मनाङले लगातार ६ खेलमा बराबरी खेल्दै अंक बाँडेको छ ।
यस्तै आजै भएको अर्को खेलमा मछिन्द्र फुटबल क्बलले एनआटीलाई २-० गोलले पराजित गरेको थियो भने संकटा र जावलाखेलले २-२ गोलको बराबरी खेलेका थिए ।
