काठमाडौं । राजधानीमा जारी एनएससी काभा महिला भलिबल च्यालेन्ज कपमा भारतले लगातार दोस्रो जित निकालेको छ ।
मंगलबार त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा सम्पन्न खेलमा भारतले किर्गिस्तानलाई ३-० को सोझो सेटमा पराजित गरेको हो ।
पहिलो सेट २५-१७, दोस्रो सेट २५-८ ले जितेको भारतले तेस्रो सेट पनि २५-८ ले जित हात पार्यो ।
योसँगै भारतले २ खेलबाट ६ अंक बनाएको छ । भारतले आफ्नो पहिलो खेलमा बंगलादेशलाई पनि ३-० को सोझो सेटमा पराजित गरेको थियो ।
च्यालेन्ज कपमा ८ राष्ट्रको सहभागिता रहेको छ । सहभागी टोलीलाई दुई समूहमा विभाजन गरिएको छ । सात दिनसम्म चल्ने प्रतियोगिताको सुरुवाती तीन दिन ४ खेल र बाँकी ४ दिन दुई खेल हुनेछन् ।
अब नेपालले जेठ ९ गते बंगलादेशसँग र जेठ १० गते भारतसँग खेल्नेछ ।
समूह एमा नेपालसँगै भारत, बंगलादेश र कीर्गिस्तान रहेको छ । अर्को समूहमा उज्वेकिस्तान, श्रीलंका, माल्दिभ्स र काजकास्तान रहेका छन् ।
दुई समूहको राउन्ड रोविन लिगपछि शीर्ष २ टोलीले सेमिफाइनलमा र पुछारमा रहेका दुई टोलीले वरियताका लागि प्रतिस्पर्धा गर्नेछन् ।
