सिन्धुपाल्चोक । नवौं संस्करणको सिन्धुकप फुटबल प्रतियोगिता अन्तर्गत दोस्रो तथा अन्तिम सेमिफाइनलमा काभ्रे जिल्ला फुटबल संघले विभागिय टोली एपिएफ फुटबल क्लबलाई पराजित गरेको छ ।
सिन्धुपाल्चोक लामोसाघुस्थित बसन्तपुर मैदानमा सम्पन्न खेलमा काभ्रेले एपिएफलाई २-१ गोलले पराजित गरेको हो । काभ्रेको जितमा अबयोमी फकुनी र कप्तान समन श्रेष्ठले समान १/१ गोल गरे । यता एपिएफको लागि प्रदिप लामाले सान्त्वना गोल गरे ।
पहिलो हाफमै २-० गोलको अग्रता बनाएको काभ्रेले दोस्रो हाफमा भने एक गोल खाएको थियो ।
यो जितसँगै काभ्रले उपाधिका लागि श्री भगवती क्लब टोखासँग खेल्नेछ । फाइन खेलले आगामी शनिबार हुनेछ ।
युथ स्पोर्ट्स क्लबको आयोजना र सिन्धुपाल्चोक जिल्ला फुटबल संघको प्रविधिक सहयोग रहेको यस प्रतियोगिताको विजेताले नगद २ लाख र उपविजेताले नगद १ लाख पाउनेछन् ।
