काठमाडौँ । एसीसी पुरुष यू-१६ इस्ट जोन कप क्रिकेटको उपाधि नेपालले जितेको छ ।
केही समय अघि सम्पन्न फाइनलमा नेपालले घरेलु टिम मलेसियालाई २२१ रनको फराकिलो अन्तरले पराजित गरेको हो ।
नेपालले दिएको २५३ रनको लक्ष्य पक्षाएको मलेसिया १४.४ ओभरमा सबै विकेट गुमाएर ३१ रन मात्रै बनाउन सक्यो ।
यता पाहुना टोली नेपालका लागि अभिषेक तिवारीले एक्लैले ५ विकेट लिए भने सन्तोष यादवले ३ तथा सागर गैरे र स्शोक धामीले एक विकेट लिएका थिए ।
त्यसअघि टस जितेर पहिला ब्याटिंग गरेको नेपालले ३५ ओभरको खेलमा ८ विकेट गुमाउदै २५२ रन बनाएको थियो ।
नेपालका लागि नरेन भट्टले अविजित ११२ रनको शतकीय पारी खेलेका थिए । नरेनले ८९ बलमा १० चौका र २ छक्का प्रहार गर्दै ११२ रन बनाएका थिए ।
त्यस्तै निरज कुमार यादवले ४७ रन बनाए भने सन्तोष यादवले २६, सुर्यान्शु कोइरालाले १८, अशोक धामीले ११ रन बनाएका थिए ।
यता घरेलु टोली मलेसियाका बलरमुहमद आक्रमले सर्वाधिक ३ विकेट लिए भने हैक्व्ल, अरीन अकील र मुहमद फथुल मुइनले एक एक विकेट लिए ।
नेपाल यस प्रतियोगिताको उपाधि जितेर ह्याट्रिक गरेको छ । नेपालले यसअघि सन् २०१७ र २०१९ मा सम्पन्न प्रतियोगिताको फाइनलमा सिंगापुर र मलेसियालाई हराएर यो उपाधि जितेको थियो ।
