काठमाडौ । नेपालले आगामी संस्करणको साफ यू-१९ च्याम्पियनसिप फुटबल प्रतियोगिताको आयोजना गर्ने भएको छ।
अखिल नेपाल फुटबल संघ (एन्फा)का महासचिव किरण राईले नेपालले साफ आयोजना गर्ने जानकारी दिएका हुन्।
उनका अनुसार प्रतियोगिता असोज ४ देखि १३ गतेसम्म हुने छ। यसअघि यो प्रतियोगिता साफ यू-२० को नामबाट आयोजना भएको थियो।
गत संस्करण भारतमा भएको उक्त प्रतियोगिताको फाइनलमा घरेलु टोलीले बंगलादेशलाई पेनाल्टी सुटआउटका ५-२ गोलअन्तरले हराउँदै दोस्रोपटक उपाधि जितेको थियो।
सिंगल राउन्ड रोबिनमा भएको प्रतियोगितामा नेपाल तेस्रो भएको थियो। नेपालले माल्दिभ्स र श्रीलंकालाई पराजित गरेको थियो।
यस्तै, बंगलादेशलाई १-१ गोलको बराबरीमा रोकेको थियो। तर, भारतसँग भने ८-० को फराकिलो हार बेहोरेको थियो।
