एएफसी कप छनोटमा नेपाली टोली मछिन्द्र फुटबल क्लब भारतको मोहन बंगान सुपर जायन्टसँग पराजित भएको छ।
यो पराजस सँगै मछिन्द्र छनोटबाट बाहिरिएको छ।
मछिन्द्र मोहन बगानसँग ३-१ गोलअन्तरले पराजित भएको हो।
बुधबार भारतको कोलकातास्थित साल्ट लेक स्टेडियममा भएको खेलमा मोहन बगानका लागि अनवर अलीले दुई गोल गरे ।
उनले खेलको ३८औं र ८६औं मिनेटमा गोल गरेका थिए । मोहन बगानका लागि अर्को एक गोल ५९औं मिनेटमा जासन कुमिङ्सले गरेका थिए ।
मछिन्द्रका लागि भने एकमात्र गोल खेलको ७८औं मिनेटमा मेसुके ओलुमोउले गरेका थिए ।
जितसँगै मोहन बगानले प्लेअफमा स्थान बनाएको छ ।
मोहन बगानले बंगलादेशको ढाका अव्हानी र माल्दिभ्सको इगल्सबीचको खेलको विजेतासँग अगस्ट २२ तारिखमा प्लेअफ खेल्ने छ । उक्त खेलको विजेतालेसाउथ जोनबाट एएफसी कपको समूहगत चरणमा स्थान बनाउने छ ।
मछिन्द्र नेपालको ‘ए’ डिभिजन लिगको उपविजेता क्लब हो । सहिद स्मारक ‘ए’ डिभिजन लिगको उपाधि भने चर्च ब्वाइज क्लबले जितेको थियो ।
तर, चर्च ब्वाइज क्लबसँग एएफसी क्लब लाइसेन्स नभएकाले मछिन्द्रले लगातार दोस्रो पटक एएफसी कप खेल्ने अवसर पाएको हो । मोहन बगान भने भारतको सुपर लिग च्याम्पियन क्लब हो ।
मछिन्द्रले पहिलो चरणमा भुटानको पारो एफसीलाई ३-२ गोलअन्तरले पराजित गर्दै दोस्रो चरणमा प्रवेश गरेको थियो।
