काठमाडौँ । इंग्लिस क्लब म्यानचेस्टर सिटीले युइएफए सुपर कपको उपाधि जितेको छ ।
गएराती भएको फइनल खेलमा म्यानचेस्टर सिटीले स्पेनिस क्लब सेभियालाई पेनाल्टी सुट आउटमा हराउँदै पहिलो पटक युइएफए सुपर कपको उपाधि जितेको हो ।
निर्धारित समयमा १-१ को बराबरीमा रोकिएपछि खेलको निर्णय पेनाल्टी सुटआउटबाट गरिएको थियो ।
खेलको २५औ मिनेटमा योउसेफ नेसयरीको गोलमा अग्रता लिएको सेभियाले खेलको ६३औ मिनेटमा गोल खाएपछि खेल बराबरी भएको थियो ।
सिटीका लागि कोल पाल्मरले गोल गर्दै खेल बराबरी गरेका थिए ।
त्यसपछि भएको पेनाल्टी सुटआउटमा सेभियाले आफ्नो पाँचौं पेनाल्टी मिस गरेपछि सिटीले खेलका साथै उपाधि जितेको थियो ।
युइएफए सुपर कप गत सिजनमा च्याम्पियन्स लिग र युरोपा लिग विजेताबीच खेलिन्छ । यो उपाधि अहिलेसम्म सबैभन्दा बढी ५/५ पटक बार्सिलोना, रियल म्याड्रिड र एसी मिलानले जितेका छन् ।
