काठमाडौँ । नेपाललाई २३ रनले हराउँदै भारत जारी एशियन गेम्स अन्तर्गत क्रिकेटको सेमिफाइनलमा पुगेको छ।
भारतले दिएको २०३ रनको लक्ष्य पछाएको नेपालले २० ओभरमा ९ विकेट गुमाउदै १७९ रन बनाएको थियो।
नेपालका लागि दिपेन्द्र सिंह ऐरीले सर्बाधिक ३२ रन बनाए भने कुशल मल्ल र सन्दीप जोराले २९/२९ रन बनाएका थिए।
त्यस्तै कुशल भुर्तेलले २८, आसिफ सेखले १०, कप्तान रोहित पौडेलले ३, सोमपाल कामीले ७, गुलशन झाले ६ रन बनाएका थिए। त्यस्तै करण केसीले १८ र सन्दीप लामिछानेले ५ रन बनाएका थिए।
यता भारतीय बलर रवि बिस्नोई र आभेस खानले ३/३ विकेट लिए भने अर्शदीप सिंहले २ विकेट लिएका थिए। त्यस्तै साइ किशोरले एक विकेट लिएका थिए।
यसअघि टस जितेर पहिला ब्याटिङ गरेको भारतले २० ओभरमा ४ विकेट गुमाउदै २०२ रन बनाएको थियो ।
भारतका लागि यशस्वी जैसवालले शतकीय पारी खेलेका थिए। उनी ४९ बलमा १०० रन बनाएर आउट भएका थिए ।
नेपालका लागि दिपेन्द्र सिंह ऐरीले २ विकेट लिएका थिए भने सोमपाल कामी र सन्दीप लामिछानेले १/१ विकेट लिएका थिए ।
योसँगै भारत सेमिफाइनलमा पुगेको छ भने नेपालको एशियन गेम्सको क्रिकेटमा यात्रा समाप्त भएको छ ।
