काठमाडौं । साविकको विजेता म्यानचेस्टर सिटीलाई आर्सनलले हराएको छ।
आइतबार राती भएको इंग्लिस प्रिमियर लिग अन्तर्गत आठौं साताको खेलमा घरेलु टोली आर्सनलले पाहुना टोली म्यानचेस्टर सिटीलाई १-० गोलले पराजित गरेको हो।
निकै रोमाञ्चक बनेको खेलमा पहिलो हाफ गोलरहित बराबरीमा सकिएको थियो।
आर्सनलको जितमा खेलको ८६औँ मिनेटमा गाब्रियल मार्टिनेलीले गरेको गोल नै खेलको निर्णायक गोल बनेको थियो।
यो जितसँगै आर्सनलको ८ खेलमा २० अंक भएको छ र लिगमा दोस्रो स्थानमा छ। त्यसैगरी म्यानचेस्टर सिटीले भने यस सिजनमा दोस्रो हार बेहोरेको छ। ८ खेलमा १८ अंकसहित सिटी तेस्रो स्थानमा रहेको छ।
