नेपालले आजदेखि काठमाडौँमा शुरु भएको त्रिकोणात्मक टी-२० सिरिजमा विजयी शुरुवात गरेको छ।
सिरिजको पहिलो खेलमा नेपालले युएईलाई ७ विकेटले पराजित गर्दै विजयी शुरुवात गरेको हो।
युएईले दिएको १४१ रनको लक्ष्य पछाएको नेपालले १९ ओभरमा ३ विकेट गुमाउदै लक्ष्य पुरा गरेको थियो।
नेपालका लागि कप्तान रोहित पौडेलले सर्बाधिक अविजित ५१ रन बनाएका थिए भने दिपेन्द्र सिंह ऐरीले ३४ रन बनाएका थिए। कप्तान पौडेल र ऐरीबीच चौथो विकेटका लागि ९२ रनको साझेदारी भएको थियो । नेपालका लागि कुशल भुर्तेलले १४ , आसिफ सेखले २३, कुशल मल्लले ११ रन बनाएका थिए।
त्यसैगरी युएईका बलर निलांश केसवानी र अली नसीरले एक एक विकेट लिएका थिए।
यसअघि टस हारेर पहिला ब्याटिङ गरेको युएईले २० ओभरमा ७ विकेट गुमाएर १४० रन बनाएको थियो । युएईका लागि बसिल हमीदले सर्बाधिक ५१ रन बनाएका थिए । त्यस्तै अलि नासीरले ३२, कप्तान मुहमद वासीमले १७, आसिफ खानले १५ रन बनाएका थिए ।
त्यसैगरी नेपाली बलर करण केसीले सर्बाधिक ३ विकेट लिएका थिए भने गुलशन झाले २ तथा सोमपाल कामी र अविनाश बोहोराले एक विकेट लिएका थिए ।
