काठमाडौं । अभिनेता दयाहाङ राई र अभिनेत्री मिरुना मगरको मुख्य भूमिका रहेको चलचित्र ‘घरज्वाइँ’को टिजर सार्वजनिक गरिएको छ ।

सार्वजनिक टिजरमा अभिनेता राईले मिरुनालाई पाउन गरेको संघर्ष देखाइएको छ । 

अनिल बुढा मगरको निर्देशनमा निर्माण भएको सिनेमाले मगर संस्कार र संस्कृतिलाई केन्द्रमा राखेको छ । पूर्वी रुकुम आसपासमा छायांकन गरिएको चलचित्रको कथा पनि निर्देशक अनिल स्वयंले लेखेका हुन् । 

असार २८ गतेदेखि प्रदर्शनमा आउने ‘घरज्वाइँ’मा दयाहाङ र मिरुनासँगै बुद्धि तामाङ, पुष्कर गुरुङ, शिशिर बाङ्देल, भोलाराज सापकोटा, खड्गबहादुर पुन, राज थापा, कविता आलेलगायत कलाकारको अभिनय रहेको छ ।