काठमाडौं । निर्देशक शंकर घिमिरेको लेखन तथा निर्देशनमा निर्माण भएको नयाँ चलचित्र ‘तेल भिसा’को पहिलो गीत ‘हरि नाम झैं’ सार्वजनिक भएको छ। 

सोमबार श्रीकृष्ण जन्माष्टमीको अवसरमा यो गीत रिलिज गरिएको हो, जसले फिल्मप्रति दर्शकहरूलाई थप उत्साहित बनाएको छ।

कल्याण सिंहको संगीतमा आधारित र हर्क साउदको शब्द रचनामा रहेको यस गीतमा निशान भट्टराई र समीरा थपलियाको सुमधुर आवाजले जीवंतता दिएको छ।  भिडियोमा चलचित्रका मुख्य कलाकार विपिन कार्की, वर्षा राउत, पूजा चन्द, ऋचा घिमिरे, बुद्धि तामाङ, र सुचित्रा उप्रेतीलाई देख्न सकिन्छ। यो गीत विशेष रूपमा विपिन कार्कीकी दिवंगत आमा सरस्वती कार्कीलाई समर्पित गरिएको छ, जसले गीतलाई थप भावनात्मक बनाएको छ।

चलचित्र ‘तेल भिसा’मा विपिन कार्कीलाई दोहोरो भूमिकामा देख्न सकिन्छ, जहाँ उनी एकैसाथ जवान र वृद्ध दुई फरक अवतारमा प्रस्तुत हुँदैछन्। चलचित्र आगामी मंसिर ७ गते नेपाल र विदेशमा एकसाथ प्रदर्शन हुने घोषणा गरिएको छ।

वेलडन क्रियसनको ब्यानरमा ऋचा घिमिरेको प्रस्तुति रहेको यस चलचित्रमा अनिल पाण्डे र शिवराज कार्कीको लगानी रहेको छ।