काठमाडौं । अभिनेता हरिवंश आचार्य र प्रकाश सपुतको मुख्य भूमिका रहने गरी चलचित्र ‘हरिबहादुरको जुत्ता’ निर्माण हुने भएको छ । चलचित्रलाई निर्देशक दिपेन्द्र के खनालले निर्देशन गर्ने भएका छन् ।
गायक तथा म्यूजिक भिडियो निर्माता सरोज ओलीले यो चलचित्र निर्माण गर्न लागेका हुन् । ओलीले बुधबार चलचित्र विकास बोर्डमा यो नाममा चलचित्र दर्ता गराउँदै निर्माण इजाजतसमेत लिएका छन् ।
चलचित्रको पटकथा तथा संवाद हरिवंशले लेखेका हुन् ।
अभिनेता आचार्य र निर्माता ओलीबीच म्युजिक भिडियोमा लगातार सहकार्य भइरहेको थियो ।
अभिनेताद्धय हरिवंश र प्रकाशसँग निर्देशक दिपेन्द्रको यो पहिलो सहकार्य हो । तीनैजनाले यसअघि सँगै चलचित्रमा काम गरेका छैनन् ।
