काठमाडौं । जारी साफ महिला च्याम्पियनसिप अन्तर्गत आज भारत र बङ्गलादेश खेल्दै छन् ।
बुधबार त्रिपुरेश्वरस्थित दशरथ रङ्गशालामा हुने खेल नेपाली समय अनुसार साँझ साढे ५ बजेदेखि सुरु हुनेछ ।
समूह ए अन्तर्गतको यो खेल बङ्गलादेशका लागि महत्त्वपूर्ण रहेको छ भने भारत यस समूहबाट सेमिफाइनलमा पुगिसकेको छ । भारतले पहिलो खेलमा पाकिस्तानलाई पराजित गरेपछि सेमिफाइनलमा पुग्ने निश्चित गरेको हो । त्यस्तै आफ्नो पहिलो खेलमा पाकिस्तानसँग बराबरीमा रोकिएको बङ्गलादेश भारतसँग २ भन्दा बढी गोल अन्तरले पराजित नभएमा पनि सेमिफाइनलमा पुग्ने सम्भावना रहेको छ ।
अहिले शून्य गोल अन्तरसहित एक अङ्क हासिल गरेको बङ्गलादेश दोस्रो स्थानमा छ भने –३ गोल अन्तरसहित एक अङ्क हासिल गरेको पाकिस्तान तेस्रो स्थानमा रहेको छ। बङ्गलादेश पाकिस्तानसँग १–१ गोलले बराबरीमा रोकिएका थिए भने भारतले पाकिस्तानलाई ५–२ ले पराजित गरेको थियो।
