काठमाडौं । नेपाल प्रिमियर लिग (एनपीएल)मा कर्णाली याक्सले पहिलो जित निकालेको छ ।
शुक्रबार कीर्तिपुरस्थित त्रिवि क्रिकेट मैदानमा जारी पहिलो खेलमा चितवन राइनोजलाई ६ विकेटले पराजित गर्दै कर्णालीले जित निकालेको हो ।
पहिलो दुई खेलमा पराजित भएको कर्णालीको यो पहिलो जित हो भने लगातार दुई खेल जितेको चितवनको यो पहिलो हार हो ।
चितवनले दिएको १३१ रनको लक्ष्य कर्णालीले १९.५ ओभरमा ४ विकेट गुमाउँदै पूरा गरेको हो । कर्णालीका लागि ओपनर शिखर धवनले ४१ बलमा ४ चौका र १ छक्का प्रहार गर्दै ४५ रन बनाए ।
त्यस अघि चितवन राइनोजले २० ओभरमा ७ विकेट गुमाउँदै १३० रन बनाएको हो । चितवनका लागि रवि बोपाराले ३५ बलमा ७ चौका र १ छक्का प्रहार गर्दै ५९ रन बनाए । कप्तान कुशल मल्लले २३, बनाउँदा विपिन रावलले ११ रन जोडे । शरद भेषावकर ६ रनमा अविजित रहे ।
