काठमाडौं । नेपाल प्रिमियर लिग (एनपीएल)मा चितवन राइनोजले सुदूरपश्चिम रोयल्सलाई हराउँदै जित निकालेको छ।
आइतबार कीर्तिपुरस्थित त्रिवि क्रिकेट मैदानमा भएको दोस्रो खेलमा चितवनले सुदूरपश्चिमलाई ३३ रनले पराजित गरेको हो ।
एनपीएलमा सुदूरपश्चिमको यो पहिलो हार हो भने चितवनको लगातार तेस्रो जित हो ।
चितवनले दिएको १६५ रनको लक्ष्य पछ्याएको सुदूरपश्चिमले १८.३ ओभरमा अलआउट हुँदै १३१ रन बनायो । सुदूरपश्चिमका लागि इशान पाण्डेले ३५ रन बनाए ।
चितवनका लागि कुशल मल्ल, जान लोफ्टी इटन, अमर रौतेलाले २–२ तथा रिजन ढकालले १ विकेट लिए ।
टस जितेर ब्याटिङ गरेको चितवनले २० ओभरमा ५ विकेट गुमाउँदै १६४ रन बनाएको थियो ।
चितवनका लागि ओपनर हसन इसाखिलले अर्धशतकीय पारी खेले । उनले ५१ बलमा ६ चौका र ३ छक्का प्रहार गर्दै ६५ रन जोडे । रवि बोपाराले ३६ रन बनाए ।
