काठमाडौं । नेपाल प्रिमियर लिग (एनपीएल)को इलिमिनेटरमा चितवन राइनोजलाई २१ रनले पराजित गर्दै कर्णाली याक्स विजयी भएको छ ।
बुधबार कीर्तिपुरस्थित त्रिवि क्रिकेट मैदानमा भएको इलिमिनेटरमा चितवन राइनोजलाई २१ रनले पराजित गर्दै कर्णाली दोस्रो क्वालिफायरमा प्रवेश गरेको हो ।
यो संगै चितवन राइनोजको एनपिएलको यात्रा रोकिएको छ ।
१७६ रनको लक्ष्य पछ्याएको चितवनले २० ओभरमा ९ विकेट गुमाउँदै १५४ रन मात्र बनाउन सक्यो ।
चितवनका लागि रवि बोपाराले ५३ रन बनाउँदा कप्तान कुशल मल्लले २१, विपिन रावलले १८ र लुक बेन्केन्सटाइनले १६ रन बनाए । कर्णालीका लागि जिशान मक्सुदले ३, कप्तान सोमपाल कामी र नन्दन यादवले २–२ विकेट लिए ।
त्यस अघि टस हारेर ब्याटिङ गरेको कर्णालीले २० ओभरमा ६ विकेट गुमाउँदै १७५ रन बनाएको थियो।
कर्णालीका लागि जयकिशन कोसावाला र विलियम बोसिस्टोले अर्धशतकीय पारी खेले । जयकिशनले ५३ रन बनाउँदा बोसिस्टो ५२ रन बनाएर आउट भए । च्याडविक वाल्टनले भने अविजित ४६ रन बनाए ।
चितवनका लागि भने सोहेल तनवीरले २ तथा कुशल मल्ल, शरद भेषवाकर र रवि बोपाराले १–१ विकेट लिए ।
