चैत १६ काठमाडौं । राजधानीमा जारी त्रिदेशीय अन्तर्राष्ट्रिय टि२० श्रृंखलामा नेपालले लगातार दोस्रो जित दर्ता गरेको छ । नेपालले मलेसियालाई ६ विकेटले पराजित गरेको हो ।
त्रिवि क्रिकेट मैदानमा मलेसियाले दिएको ११५ रनको सामान्य लक्ष्य पाएको नेपालले १३.४ ओभरमा ४ विकेटको क्षतिमा पूरा गर्यो । नेपालको जितमा आसिफ शेखले ५७ रनको अर्धशतकीय इनिङ खेले । उनले ३१ बलमा ५० रन पूरा गरेका थिए । यस्तै उनले कुल ३८ बलमा ७ चौका र एक छक्कासहित ५७ रनको महत्वपूर्ण योगदान दिए ।
यता दिपेन्द्रले २१ रन, रोहित कुमार पौडेल १२ र डेब्यु खेलाडी दिलिप नाथले सात बलमा ३ चौकासहित १५ रनमा नटआउट रहे भने र कुशल मल्लले २ नटआउट रहे ।
यता मलेसियाका लागि पवनदिप सिंहले सर्वाधिक २ विकेट लिदाँ महोमद आमिर र सैयद अजिजले समान ११ विकेट हात पारे ।
उक्त जितसँगै नेपालले २ खेलमा २ जित सँगै ४ अंकका साथ शीर्ष स्थानमा रहेको छ । नेपालले यसअघि सोमबार आफ्नो पहिलो खेलमा पिएनजीमाथि १५ रनको रोमाञ्चक जित निकालेको थियो ।
