सुनमाया 
तिमीलाई थाहा छ ?
हाम्रो घरको चुल्हो मुस्किलले सल्किन्छ

जब सल्किन्छ 
म देख्छु धुवाँमा 
मेरी आमा साकिरा झैँ ब्रेक डान्स गर्दैछिन् 

कहिले पातली गाईको थुनमा
कहिले घर मास्तिरको पाखो बारीमा
त कहिले घरको दैलामा
मेरी आमाको हात कलात्मक रुपमा सर्‍याकसुरुक गरिरहेछ 

मलाई लाग्छ मेरी आमा-
कुनै रियालिटी शोमा भाग जनाउँदैछिन् 
तर बिडम्बना
निर्णायकहरु आँखा बन्द गरेर, कान थुनेर
बेसोमत हल्ला गरिरहेछन् 

र त उनी हरेकपटक आउट हुन्छिन् 
जिन्दगीको रियालिटी सोबाट 
फेरि पनि मेरी आमा 
मुस्किलले सल्किएको चुल्होबाट निस्किएको धुवाँमा
अझै पनि डान्स गरिरहेछिन् ।

बिना थेङ तामाङ