एजेन्सी । पोर्चुगिज सुपरस्टार क्रिस्टियानो रोनाल्डोले डेब्यु गरेको खेलमा इंग्लिस प्रिमियर लिग फुटबल क्लब म्यानचेस्टर युनाइटेडले सहज जित निकालेको छ ।
शनिबार राति भएको न्युकासलसँगको खेलमा युनाइटेडले ४–१ गोलको जित निकालेको हो ।
युनाइटेडको मैदान ओल्ड ट्राफोर्डमा घरेलु टिमलाई जिताउन रोनाल्डोले दुई गोल गरे भने ब्रुनो फर्नान्डेस र जेसे लिङ्गार्डले एक–एक गोल गरे । न्युकासलका जोभियर मनकुइलोले एक गोल फर्काए ।
पहिलो हाफको इन्ज्युरी समयमा रोनाल्डोले गोल गर्दै युनाइटेडलाई सुरुवाती अग्रता दिलाए । ५६औं मिनेटमा मनकुइलोले गोल गर्दै पाहुना टिमलाई बराबरीमा फर्काए ।
६२औं मिनेटमा रोनाल्डोले दोस्रो गोल गर्दै युनाइटेडलाई पुनः अग्रता दिलाउँदा ८०औं मिनेटमा फर्नान्डेसले गोल गर्दै ३–१ गोलको अग्रता दिलाए । इन्ज्युरी समयमा लिङ्गार्डले गोल गर्दै युनाइटेडलाई ४–१ गोलको जित दिलाए ।
योसँगै रोनाल्डोले दोस्रो पटक युनाइटेडबाट सानदार डेब्यु गरेका छन् । ३६ वर्षीय फरवार्ड १२ वर्षपछि ओल्ड ट्राफोर्ड फर्किएका हुन् ।
उक्त जितसँगै युनाइटेडले चार खेलमा १० अङ्क जोडेको छ । ऊ शीर्ष स्थानमा छ ।
