काठमाडौँ । पर्यटनमन्त्री सुदन किराँतीले फ्लाई दुबईको विमानमा चरा नठोक्किएको दाबि गरेका छन् ।

सामाजिक सञ्जालमा लेख्दै मन्त्री किराँतीले जहाजमा चरा ठोक्किएको हल्ला अहिलेसम्म प्रमाणित नभएको बताएका हुन् ।

यसअघि गएराती फ्लाई दुबईले भने उडान भर्ने क्रममा विमानमा चरा ठोक्किएको दाबि गरेको थियो ।

फ्लाई दुबईका प्रवक्ताले काठमाडौँबाट उडको फ्लाई दुवईको उडान नम्बर ५७६ को विमानमा उडानका क्रममा चरा ठोक्किएको बताएका थिए ।

फ्लाई दुबईले उडानका सबै प्रक्रिया पुरा गरेर विमानलाई नियमित उडान तालिका अनुसार नै दुबई पुर्याएको थियो । 

मन्त्री किराँतीले लेखेका छन्- गाउँमा गाई भैंसी गोठालो गरेर आएको मान्छे हुँ, आज शहरमा हवाईजहाजको गोठालो गर्दैछु। गाई भैंसी भन्दा हवाईजहाजको गोठालो गर्न धेरै कठिन रहेछ। आज राति मैले  राम्ररी थाहा पाएँ । र जहाँसम्म जहाजमा चरा ठोकिएको हल्ला अहिले सम्म प्रमाणित नभएको कुरा पनि सबैमा स्पष्ट गर्दछु ।

कृपया मेरो सबैमा बिन्ती छ नकरात्मक हल्ला गर्ने बानी हामी सबैले छोडौं । "कागले कान लग्यो भनेर कागलाई खेद्नु भन्दा पहिला आफ्नो कान छाम्नु पर्छ नत्र लडिन्छ ।"

यस विषयमा पाइलट र एटीसीबीचको कुराकानी तथा फ्लाई दुबईले दिएको जानकारी फरक पर्न गएको भन्दै नेपाल नागरिक उड्डयन प्राधिकरणले थप अनुसन्धान गरिरहेको बुझिएको छ ।