एजेन्सी । युइएफए च्याम्पियन्स लिग फुटबलमा जर्मन क्लब बायर्न म्युनिखले स्पेनको क्लब बार्सिलोनामाथि सहज जित दर्ता गरेको छ ।
मङ्गलबार राति भएको समूह चरणको खेलमा बायर्नले बार्सिलोनालाई उसैको घरमा ३-० गोलले हराएको हो ।
क्याप नोउमा भएको खेलमा बायर्नलाई जिताउन रोबर्ट लेवान्डोस्कीले दुई तथा थोमस मुलरले एक गोल गरे । खेलको ३४औं मिनेटमा मुलरले गोल गर्दै बायर्नलाई पहिलो हाफभरि १-० गोलकोअग्रता दिलाएका थिए ।
त्यस्तै दोस्रो हाफको खेलको ५६औं मिनेट र ८५औं मिनेटमा लेवान्डोस्कीले गोल गर्दै बायर्नलाई ३-० गोलको सहज जित दिलाए । यसअघि च्याम्पियन्स लिगमा यी दुई टिमको भिडन्त सन् २०१९/२० को सिजनमा भएको थियो । जसमा बायर्नले बार्सिलोनामाथि ८–२ गोलअन्तरको फराकिलो जित निकालेको थियो ।
उक्त जितसँगै समूह ‘ई’को बायर्नले पहिलो खेलमा ३ अंक जोड्दै सुखद सुरुवात गरेको छ । बार्सिलोनाले भने हारबाट प्रतियोगिताको थालनी गरेको छ ।
