असोज १ काठमाडौं । एएफसी महिला एसियन कप छनौट खेलमा सहभागी जनाउन उज्वेकिस्तान पुगेको नेपाली राष्ट्रिय महिला फुटबल टोलीका सदस्यहरूको नियमित पीसीआर परीक्षणको प्रावधान गरिएको छ ।
यस्तै नेपाली टोलीको आज दोश्रो पीसीआर परीक्षण गरिएको छ । पहिलो परिक्षणमा सबै नतिजा नेगेटिभ आएको थियो । यस्तै औपचारिक बैठक, आवतजावतका क्रियाकलापलाई न्यूनीकरण गरिएको छ । अभ्यास समय र खेलका दिनबाहेक कुनै पनि टोलीलाई होटेलको हाता बाहिर जान दिइएको छैन ।
टोलीका अफिसियलहरूका बैठक तथा प्रेससँगको भेटघाटलाई पनि सकेसम्म भर्चुअल आयोजना गरिएका छन् । बिहीबार प्रि–म्याच कन्फरेन्समा सहभागी टोलीका मुख्य प्रशिक्षकहरूले सहभागिता जनाए भने खेलपछिका पत्रकार सम्मेलन पनि कोरोना भाइरसका कारण आयोजना नगरिने आयोजकले बताएको छ ।
कोरोना भाइरस कै कारण खेलहरू हेर्न दर्शकहरू आउन पाउने छैनन् । मिडिया सेन्टरको प्रावधान पनि हटाइएको छ।
नेपालले समूह एफ मा भोलि फिलिपिन्स र ५ असोजमा हङकङको सामना गर्दै छ । समूहको विजेता भारतमा हुने एएफसी महिला एसियन कपमा स्थान बनाउनेछ ।
