एजेन्सी । इटालियन सिरी ए फुटबलको नयाँ सिजन २०२१/२२ को आफ्नो पाँचौं खेलमा युभेन्टसले पहिलो जित निकालेको छ । बुधबार राति भएको खेलमा युभेन्टसले स्पेजियालाई ३-२ गोलले हराएको हो ।
स्पेजियाको घरेलु मैदानमा भएको खेलमा पाहुना टोली युभेन्टसलाई जिताउन मोइसे किन, फेडेरिको चिसा र माथिस डी लाइटले १/१ गोल गरे । स्पेजियाका इम्यानुअल ग्यासी र जेनिस एन्टिस्टेले १/१ गोल गरे ।
खेलको किनले २८औं मिनेटमा गोल गर्दै युभेन्टसलाई सुरुवाती अग्रता दिलाएका थिए । ३३औं मिनेटमा ग्यासीले गोल गर्दै पहिलो हाफमा स्पेजियालाई १–१ गोलको बराबरीमा फर्काए ।
त्यस्तै दोस्रो हाफको खेलको ४९औं मिनेटमा आर्टिस्टेले गोल गरेपछि स्पेजियाले २–१ गोलको अग्रता बनायो । ६६औं मिनेटमा चिसाले गोल गरेपछि युभेन्टस बराबरीमा फर्कियो । ७२औं मिनेटमा डी लाइटले गोल गर्दै युभेन्टसलाई ३–२ गोलले जिताए ।
उक्त जितसँगै युभेन्टस १३औं स्थानमा उक्लिएको छ । युभेन्टसले ५ खेलमा ५ अंक जोडेको छ । यता स्पेजिया भने ४ अंकका साथ १७औं स्थानमा छ ।
