काठमाडौं । नारायणगढ–मुग्लिन सडकखण्डको सिमलतालमा गत शुक्रबार पहिरोमा परी त्रिशूली नदीमा बेपत्ता भएका दुई बसका यात्रुमध्ये हालसम्म १९ जनाको शव प्राप्त भएको छ ।

जिल्ला प्रहरी कार्यालय चितवनका अनुसार १९मध्ये १४ जनाको सनाखत भएको छ भने पाँच जनाको पहिचान हुन बाकी छ ।

गत असार २८ गते शुक्रबार वीरगञ्जबाट काठमाडौँ आउँदै गरेको बागमती प्रदेश ०३–००६ ख १५१६ नम्बरको एञ्जल डिलक्स र काठमाडौँबाट गौर जाँदै गरेको बागमती प्रदेश ०३–००१ ख २४९५ नम्बरको गणपति डिलक्सको बस यात्रुसहित पहिरोमा परी त्रिशूली नदीमा खसेको थियो ।

दुवै बसमा गरी ६५ यात्रु रहेकोमा तीनजनाले पौडिएर ज्यान जोगाएका थिए भने अझै ४३ जनाको अवस्था अज्ञात छ । नदीमा बेपत्ता बस र यात्रुको खोजीकार्य भइरहेको छ । 

सिमलताल घटनाको लागि गृहमन्त्रालयले गठन गरेको कार्यदलले बुधबार घटनास्थलमा गएर आफ्नो काम समेत थालेको छ ।