काठमाडौं । लगातारको वर्षाका कारण आज (शुक्रवार) राति नारायणगढ–मुग्लिन सडकखण्डमा सवारीसाधन सञ्चालनमा रोक लगाइएको छ । 

अविरल र लगातारको वर्षाका कारण पहिरोको जोखिम उच्च रहेको भन्दै जिल्ला सुरक्षा समितिको बैठकले सवारीसाधन सञ्चालनमा रोक लगाउने निर्णय गरेको हो ।

चितवनका प्रमुख जिल्ला अधिकारी इन्द्रदेव यादवका अनुसार बैठकले बिहानैदेखि पानी परिरहेको र रातिमा पनि पानी पर्न सक्ने देखिएकोले मानवीय तथा भौतिक क्षति नहोस् भनेर रातको समयमा कुनै पनि सवारीसाधन चलाउन नदिने निर्णय गरेको हो ।

यादवका अनुसार शुक्रवार बेलुका ७ बजेदेखि बिहान ५ बजेसम्म गाडी चलाउन पाइने छैन । अत्यावश्यक सवारी भने सञ्चालन हुन बताइएको छ ।