एजेन्सी । स्पेनिस ला लिगा फुटबमा साविक विजेता एथ्लेटिको मड्रिड रियल सोसिडाडसँग बराबरीमा रोकिएको छ । आइतबार राति भएको खेलमा एथ्लेटिकोले घरेलु मैदानमा सोसिडाडसँग २-२ गोलको बराबरी खेल्दै अङ्क बाँडेको हो ।
कुनै समय २-० गोलले पछि परेको घरेलु टोलीर्ला स्टार फवार्ड लुइस स्वारेजले जोगाए । खेलको सातौं मिनेटमा एलेक्जेन्डर सर्लथले गोल गर्दै पाहुना टोलीलाई सुरुवाती अग्रता दिलाएका थिए । त्यस्तै ४८औं मिनेटमा एलेक्जेन्डर इसकले गोल गरेपछि सोसिडाडले आफ्नो अग्रता दोब्बर बनाएको थियो ।
तर दोस्रो हाफको खेलको ६१औं मिनेटमा स्वारेजले गोल गरेपछि एथ्लेटिको २-१ को अवस्थामा फर्कियो । ७७औं मिनेटमा एथ्लेटिकोले पेनाल्टीको मौका पाएको थियो, जसमा स्वारेजले गोल गर्दै एथ्लेटिकोलाई २-२ गोलको बराबरीमा फर्काए ।
उक्त बराबरीसँगै सोसिडाडले १० खेलमा २१ अङ्क जोड्दै शीर्ष स्थानमा उक्लिएको छ । चौथो स्थानको एथ्लेटिकोले भने नौ खेलमा १८ अङ्क जोडेको छ ।
