एजेन्सी । फ्रेन्च लिग वान फुटबलमा पेरिस सेन्ट जर्मेन (पीएसजी) ले पुनरागमन जित निकालेको छ । शुक्रबार राति भएको खेलमा पीएजजीले साविकको विजेता लिलमाथि १-० गोलले पछि परेको स्थिति उल्टाउदै २-१ को पूनरागमन जित निकालेको हो ।
पीएसजीको जितमा अर्जेन्टिनी मिडफिल्डर एन्जल डि मारियाले एक गोलसँगै एक असिस्ट उपलब्ध गराए । मार्किन्हसले एक गोल गरे । पहिलो हाफमा पछि परेको पीएसजीले दोस्रो हाफमा दुई गोल गर्दै जित निकाल्न सफल भएको हो ।
खेलको ३१औं मिनेटमा लिलका जोनाथन डेभिडले गोल गर्दै भ्रमणमा रहेकाे लिललाई अग्रता दिलाए । दोस्रो हाफमा डि मारियाको पासमा ७४औं मिनेटमा मार्किन्हसले बराबरी गोल गरे ।
खेल सकिन २ मिनेट अघि नेयमारको पासमा डि मारियाले उत्कृष्ट फिनिसिङ गर्दै टोलीलाई महत्त्वपूर्ण तीन अंक दिलाए । खेलमा स्टार खेलाडी लिओनल मेस्सी जारी सिजनको लिग वानमा अझै गोल बिहीन बनेका छन् । उनले यो सिजन ५ खेल खेल्दा अझै गोल गर्न सकेका छैनन् ।
उक्त जितसँगै शीर्ष स्थानमा रहेको पीएसजीको १२ खेलबाट ३१ अंक पुगेको छ । यता पराजित लिल १५ अंक जोडेर ११औं स्थानमा रहेको छ ।
