मंसिर २ काठमाडौं । भारतले पहिलो टि-२० क्रिकेटमा न्युजिल्यान्डलाई हराएको छ । जयपुरमा गएराति भएको खेलमा भारतले न्युजिल्यान्डलाई ५ विकेटले हराएको हो ।
घरेलु टोली भारत जितका लागि न्युजिल्यान्डले दिएको १ सय ६५ रनको लक्ष्य १९ ओभर ४ बलमा ५ विकेट गुमाएर भेट्टायो । भारतका सूर्यकुमार यादवले ६२ रनको अर्धशतकीय पारी खेले । यस्तै कप्तान रोहित शर्माले ४८ रन जोडे । न्युजिल्यान्डका ट्रेन्ट बोल्डले २ विकेट लिए ।
टिम साउथी, ड्रयाल मिचेल र मिचेल स्टानरले १/१ विकेट लिए । यसअघि टस हारेर पहिले ब्याटिङ गरेको न्युजिल्यान्डले २० ओभरमा ६ विकेट गुमाएर १ सय ६४ रन बनाएको थियो । न्युजिल्यान्डका मार्टिन गुप्टिल र मार्क चापम्यानले अर्धशतकीय पारी खेले ।
गुप्टिलले ७० तथा मार्कले ६३ रन जोडे । भारतका भुवनेश्वर कुमार र रविचन्द्र आश्विनले २/२ विकेट लिए । दीपक चाहर र मोहमद सिराजले १/१ विकेट लिए । उक्त जितसँगै तीन खेलको श्रृङ्खलामा भारतले १-० को अग्रता बनाएको छ । दोस्रो खेल भोलि हुनेछ ।
