काठमाडौँ । नेपाल स्टक एक्सचेञ्ज नेप्से कारोबारको अन्तिम दिन दोहोरो अंकले घटेको छ । बिहीबार नेप्से १५ .१३ अंकले घटेर तीन हजार ७९ दशमलब ८२ विन्दुमा रोकिएको हो ।
यस दिन कारोबार रकममा पनि गिरावट आई १० अर्ब ९० करोड ५८ लाखमा खुम्चिएको छ । कारोबार भएका समूहमध्ये दुई समूहबाहेक अन्य सबै समूह घटेका छन् ।
कारोबार भएका कम्पनीमध्ये दुई कम्पनीको शेयरमूल्यमा भने उच्च बृद्धि भएको छ । शेयरमूल्य बढ्ने कम्पनीहरुमा रिडी हाइड्रोपावर डेभलपमेन्ट कम्पनी र बिहीबार नै कारोबार सुरु गरेको कम्पनी जीवन विकास लघुवित्त वित्तीय संस्था रहेका छन् ।
रिडी हाइड्रोपावर डेभलपमेन्ट कम्पनीको शेयरमूल्य आज ९ . ९५ प्रतिशतले बढेर प्रतिकित्ता ७२९ पुगेको छ भने जीवन विकास लघुवित्त वित्तीय संस्था शेयरमूल्य ८.२२ प्रतिशतले बढेर प्रतिकित्ता ९८९. १० कायम भएको छ ।
यस्तै, सबै भन्दा धेरै सेयर मूल्य घट्नेमा गुडविल फाइनान्स रहेको छ । जसको शेयरमूल्य ७ प्रतिशत भन्दा बढीले घटेको छ ।
कारोबारको आधारमा भने आज सबैभन्दा बढी गुडविल फाइनान्सको भएको छ । गुडविलले ४ लाख २२ हजार ६ सय ३४ कित्ता किनबेचमा करिब ३४ करोडको कारोबार गरेको छ ।
