एजेन्सी । स्पेनिस ला लिगा फुटबल अन्तर्गत आफ्नो ३४औं साताको खेलमा इस्पानियोलमाथि ४-० गोलको फराकिलो जित निकाल्दै रियल मड्रिड जारी सिजन २०२१/२२ को लिग च्याम्पियन बनेको छ ।
शनिबार राति रियलको घरेलु मैदानमा भएको खेलमा घरेलु टोलिको जितमा युवा फरवार्ड रोड्रिगोले दुई तथा मार्को एसेन्सीयो र करिम बेन्जेमाले १/१ गोल गरे ।
एकतर्फी बनेको खेलमा रियलले पहिलो हाफ र दोस्रो हाफमा समान दुई दुई गोल गरे ।
उक्त जितसँगै रिलले ८१ अंकका साथ लिग च्याम्पियन बनेको हो । उसले दोस्रो स्थानको सेभिल्लालाई १७ तथा तेस्रो स्थानको बार्सिलोनालाई १८ अंकले पछि पर्दै कीर्तिमानी ३५औं पटक ला लिगाको उपाधि उचालेको छ । यस्तै रियल पछि बर्सिलोनाले २६औं पटक ला लिगा जितेको छ ।
