पुस ७ काठमाडौं । हालका दिनमा अभिनेत्री ज्याकलिन फर्नान्डिज र महाठग सुकेश चन्द्रशेखरको चर्चा बलिउडमा निकै छ । सुकेशसँग ज्याकलिनको रोमान्टिक तस्वीर भाइरल भएकै कारण ज्याकलिनमाथि तनाव बढेको छ ।
यो विषयमा जाँच एजेन्सी इडीले ज्याकलिनमाथि कैयौंपटक सोधपुछ गरिसकेको छ र ज्याकलिन हरेक पटक सुकेशसँगको सम्बन्धलाई कुनै न कुनै प्रकारले अस्वीकार गरिरहेकी छन् । यो घटनाले फिल्म निर्मातालाई प्रभावित बनाएको छ ।
निर्माताहरुलाई यसको कथा र प्लट राम्रो लागेको छ । कैयौं निर्माता तथा निर्देशकहरु यो घटनाको विषयमा एक वेब सिरिज वा वृत्तचित्र बनाउने तयारीमा छन् । यो विषयमा धेरै जानकारी बाहिर नआए पनि एक महाठगले अभिनेत्रीलाई फसाउन खोजेको विषयमा जोकोहीको चासो बढेको छ ।
सुकेशले ज्याकलिनलाई साथी बनाउदै उनलाई २ सय करोड रुपैंयाँको सुपरहिरो वेब सिरिजमा प्रमुख भूमिका दिने वचन दिएका थिए । ज्याकलिनले फिल्ममा अफर नपाएको र यसले उसलाई तनाव दिइरहेको सुकेशले थाहा पाएपछि उनले वेब सिरिजको प्रस्ताव राखेका थिए ।
