वैशाख १९ काठमाडौं । आजदेखि सेवानिबृत्त हुन लाग्नुभएका सशस्त्र प्रहरी महानिरीक्षक पुष्पराम के.सी. र सशस्त्र प्रहरी अतिरिक्त महानिरीक्षक रामशरण पौडेललाई फौजी परम्परा अनुसार स–सम्मान बिदाई गरिएको छ ।

सशस्त्र प्रहरी बल नेपाल प्रधान कार्यालय हल्चोक स्वयम्भूमा बैशाख १८ गते आयोजित विशेष समारोहका बीच उहाँहरुलाई सशस्त्र प्रहरी अतिरिक्त महानिरीक्षक राजु अर्यालले फुलमालाका साथ मायाको चिनो प्रदान गर्नुहुँदै हार्दिक बिदाई गर्नुभएको हो ।

यसैगरी सशस्त्र प्रहरी परिवार महिला संघकी अध्यक्ष श्रीमती ज्योती के.सी.लाई सो संघकी उपाध्यक्ष श्रीमती अनिता अर्यालले फुलमालासहित हार्दिक बिदाई गर्नुभयो । त्यसैअवसरमा सशस्त्र प्रहरी महानिरीक्षक पुष्पराम के.सी.ले सशस्त्र प्रहरी अतिरिक्त महानिरीक्षक राजु अर्याललाई संगठनको सम्पूर्ण जिम्मेवारी बर-बुझारथ गर्नुभयो ।

त्यसअवसरमा सशस्त्र प्रहरी महानिरीक्षक पुष्पराम के.सी. र सशस्त्र प्रहरी अतिरिक्त महानिरीक्षक रामशरण पौडेलले आ–आफ्नो  मन्तव्य राख्नुभएको थियो । समारोहमा सम्बोधनको क्रममा सशस्त्र  प्रहरी अतिरिक्त महानिरीक्षक राजु अर्यालले उहाँहरुले सशस्त्र प्रहरी बल नेपालमा ३० बर्षसम्म सेवारत रहेर राष्ट्रको सुरक्षा आम नागरिकको सेवा र सांगठनिक विकासमा पु¥याउनु भएको योगदानको मुक्तकण्ठले प्रशंसा गर्नुहँुदै उहाँहरुको आगामी जीवन सुखमय रहोस् भनि हार्दिक शुभकामना व्यक्त गर्नुभयो ।

त्यसअवसरमा सशस्त्र प्रहरी महानिरीक्षक पुष्पराम के.सी. र सशस्त्र प्रहरी अतिरिक्त महानिरीक्षक रामशरण पौडेलको सम्मानमा सशस्त्र प्रहरी बल नेपालको एक टोलीले सलामी अर्पण गरेको थियो । उक्त विदाई समारोह लाईभ भिडियो स्ट्रिमिङ्ग तथा सशस्त्र प्रहरी बल नेपालको संचार मार्फत सम्पूर्ण इकाईहरुमा हेर्ने र सुन्ने व्यवस्था मिलाईएको थियो । समारोहमा सशस्त्र प्रहरी बल नेपालका बरिष्ठ अधिकृतहरुका साथै सशस्त्र प्रहरी परिवार महिला संघका पदाधिकारीहरु लगायत सकल दर्जाका सशस्त्र प्रहरी कर्मचारीहरुको उपस्थिती रहेको थियो ।